🇮🇳વંદે માતરમ 🇮🇳અંગે કેન્દ્ર સરકારના નવા નિયમ હવે દરેક સરકારી કાર્યક્રમમાં 'વંદે માતરમ' વગાડાશે, 3 મિનિટ 10 સેકન્ડના ગીત માટે સાવધાન મુદ્રામાં ઊભા રહેવું ફરજિયાત રાષ્ટ્રગીત અને રાષ્ટ્રગાન એકસાથે વગાડવાનું થાય તો પહેલા વંદે માતરમ્ વગાડાશે

Vande Mataram: भारत सरकार દ્વારા રાષ્ટ્રગીત 'વંદે માતરમ્'ના સન્માન અને તેના ગાયન માટે વર્ષ 2026થી નવા નિયમોની જાહેરાત કરવામાં આવી છે. આ નવા પ્રોટોકોલ મુજબ હવે કોઈપણ સરકારી કે સત્તાવાર કાર્યક્રમમાં વંદે માતરમ્ નું સન્માન રાષ્ટ્રગાન (જન ગણ મન)ની સમકક્ષ જાળવવાનું રહેશે અને કાર્યક્રમમાં બંને ગીતોનો સમાવેશ હોય ત્યારે સૌપ્રથમ વંદે માતરમ્ ગાઈને કાર્યક્રમની શરૂઆત કરવાની રહેશે. જે રીતે રાષ્ટ્રગાન વખતે સાવધાનની મુદ્રામાં ઊભા રહેવામાં આવે છે, તે જ રીતે હવે વંદે માતરમ વખતે પણ ઊભા રહેવું ફરજિયાત કરવામાં આવ્યું છે. આ નવા નિયમો રાષ્ટ્રધ્વજ ફરકાવવા, કાર્યક્રમોમાં રાષ્ટ્રપતિ કે રાજ્યપાલના આગમન અને તેમના સંબોધન પહેલા તેમજ બાદમાં લાગુ પડશે. અત્યાર સુધી વંદે માતરમના માત્ર પ્રથમ કેટલાક અંશો જ ગાવાની પરંપરા રહી હતી, પરંતુ નવા નિયમ મુજબ હવે તેના 6 છંદો ગાવામાં આવશે અને આ સમગ્ર ગાયન માટે અંદાજે 3 મિનિટ અને 10 સેકન્ડનો સમય નિર્ધારિત કરવામાં આવ્યો છે. સરકારનો આ નિર્ણય રાષ્ટ્રીય ગીતના ઐતિહાસિક મહત્ત્વને જાળવી રાખવા અને સ્વતંત્રતા સંગ્રામના આ પ્રતીકને પૂરતું સન્માન આપવા માટે લેવામાં આવ્યો છે જેથી સાર્વજનિક કાર્યક્રમોમાં એકસૂત્રતા જળવાઈ રહે.